Os números até unu miliardo, as estações (vintro, printempo, somero, aŭtuno), o relógio (kioma horo estas?) e os comparativos pli/malpli/plej.
Unu, du, tri estas nombroj. Lisa nombras pomojn: unu, du, tri, kvar, kvin, ses, sep, ok, naŭ, dek, dek unu, dek du, dek tri, dek kvar, dek kvin (15), dek ses (16), dek sep (17), dek ok (18), dek naŭ (19), dudek (20), dudek unu (21), dudek du (22), dudek tri (23)... dudek naŭ (29), tridek (30), tridek unu (31), tridek du (32)... kvardek (40)... kvindek (50)... sesdek (60)... sepdek (70)... okdek (80)... naŭdek (90)... cent (100). Dek estas unu kaj nulo. Cent estas unu kaj du nuloj. Unu kaj tri nuloj estas mil. Unu kaj kvar nuloj estas dek mil. Unu kaj kvin nuloj estas cent mil. Unu kaj ses nuloj estas unu miliono. Mil milionoj estas unu miliardo.
Nombru!
— Lisa, nombru ĝis dek! — diras Vera.
Vera nombras: unu, du, tri, kvar, kvin, ses, sep, ok, naŭ kaj dek.
— Ĉu vi scias, kiu nombro estas antaŭ dek? — demandas Vera.
Lisa scias kaj diras: antaŭ dek estas naŭ kaj post dek estas dek unu.
— Kiu nombro estas antaŭ cent?
— Naŭdek naŭ!
— Kiu nombro estas post cent?
— Cent unu!
— Nombru ĝis unu miliardo! — diras Vera al Karlo, sed li respondas: mi ne havas tempon!
Karlo skribas kelkajn nombrojn kaj diras al Vera:
— Vera, diru la nombron 47!
— Kvardek sep!
— Diru ankaŭ 569!
— Kvincent sesdek naŭ!
— Kaj ankaŭ 1961!
— Mil naŭcent sesdek unu!
Karlo skribas la nombron 8 kaj diras al Lisa:
— Diru la nombron!
Lisa konas la nombron kaj diras tuj “ok”.
— Skribu, Lisa, la nombron unu kaj nulo kaj diru ĝin!
Lisa tuj skribas la nombron kaj diras “dek”!
Kaj tuj post tio ĉi ŝi demandas Karlon:
— Kiom da nuloj havas cent?
Li diras tion kaj ŝi skribas la grandan nombron.
— Lisa, se vi scias la nombrojn inter kvardek kaj kvindek, diru ilin!
Ŝi tuj respondas kaj nombras:
— Kvardek unu, kvardek du, kvardek tri... kvardek naŭ.
— Vera, diru la nombron 1 kun 7 nuloj! — diras Karlo.
Sed ŝi ne tuj respondas, sed skribas la nombron 10 000 000.
Post tio ŝi diras: dek milionoj!
— Lisa ne scias, sed vi scias, kiun jaron ni havas nun?
— Ni nun havas la jaron mil naŭcent sesdek du.
— Kiom da tagoj havas unu jaro?
— Unu jaro havas tricent sesdek kvin aŭ tricent sesdek ses tagojn.
— Kiom da tagoj havas februaro?
— Ĝi havas dudek ok aŭ dudek naŭ tagojn.
— Kiom da tagoj havas decembro?
— Ĝi havas tridek unu tagojn.
— Lisa, kiom da jaroj havas vi?
— Mi havas kvin jarojn.
— Ĉu Vera havas dek jarojn?
— Ne, ŝi havas dek unu jarojn. Aŭ: ŝi estas dekunu-jara.
— Ĉu mi estas dekdu-jara aŭ dektri-jara?
— Vi estas 13-jara. Vi ankoraŭ ne estas 14-jara.
Unu jaro estas longa tempo. Unu sekundo estas mallonga tempo. Unu jaro estas pli longa tempo ol unu monato. Unu monato estas pli longa tempo ol unu semajno. Januaro estas pli longa tempo ol februaro, ĉar februaro havas nur dudek ok aŭ dudek naŭ tagojn, sed januaro havas tridek unu. Karlo estas pli granda ol Vera. Karlo estas pli aĝa ol Vera, ĉar li havas 13 jarojn, kaj ŝi havas nur dek unu. Vera estas pli aĝa ol Lisa, sed Karlo estas la plej aĝa. Vera estas pli forta ol Lisa, sed Karlo estas la plej forta el ĉiuj gefratoj. Vera estas malpli forta ol Karlo. Ŝi estas ankaŭ malpli granda. Februaro estas malpli longa monato ol januaro, kaj unu semajno estas malpli longa ol unu monato. Karlo demandas, kaj Lisa respondas. Se Lisa ne scias, Vera respondas. La du grandaj gefratoj instruas la malgrandan fratinon, kaj ŝi lernas. Ŝi lernas pri la tempo. Vera kaj Karlo instruas ŝin pri la tempo.
— Kiu nombro havas pli multajn nulojn, mil aŭ cent?
— Mil, ĉar ĝi havas tri nulojn, sed cent havas nur du.
— Kiu estas pli aĝa, via patro aŭ via patrino?
— Nia patro estas pli aĝa ol nia patrino. Ĉu ne?
— Jes, Lisa, nia patro estas pli aĝa.
Ĉu vi scias, kiu monato estas post januaro?
— Jes, post januaro estas februaro.
— Kiu monato estas antaŭ aprilo?
— Antaŭ aprilo estas marto.
— Diru la monatojn inter aŭgusto kaj oktobro!
Sed Lisa ne tuj respondas.
Ŝi pensas.
Post tio ŝi respondas:
— Inter aŭgusto kaj oktobro estas nur unu monato, septembro.
— Bone, Lisa! — diras Karlo.
Vi estas inteligenta knabino.
Vi pensas bone kaj inteligente.
Ĉu vi pensas ofte pri Kristnasko?
— Ne, ne pri Kristnasko mi pensas ofte, ankoraŭ ne, sed mi pensas ofte pri mia pupo kaj ĝiaj amikoj Mimi kaj Pluto.
— Ĉu vi pensas, ke Kristnasko estas en septembro?
— Ne, mi scias, ke ĝi estas en decembro.
— Kiu tago estas antaŭ lundo?
— Dimanĉo estas antaŭ lundo.
— Kiu estas la tago post lundo?
— Post lundo estas mardo.
— Kiu tago estas inter mardo kaj ĵaŭdo?
— Inter mardo kaj ĵaŭdo estas merkredo.
— Ĉu vendredo estas antaŭ aŭ post sabato?
— Ĝi estas antaŭ sabato. Post sabato estas dimanĉo.
— Ĉu vi scias, ke mia naskiĝotago estas en januaro?
— Jes, mi scias, ke ĝi estas la deka de januaro.
— Jes. Kiam estas via naskiĝotago?
— Mia naskiĝotago estas la 12-a (dekdua) de oktobro.
— Kiam estas la naskiĝotago de via patrino?
— Ĝi estas la oka de aŭgusto.
— Kiam estas Kristnasko?
— Ĝi estas la 25-a de decembro.
— Kiu dato estas hodiaŭ?
— Hodiaŭ estas (Lisa rigardas la kalendaron) la 9-a de oktobro.
— Ĉu hodiaŭ estas lundo?
— Ne, hodiaŭ ne estas lundo, sed sabato.
— Ĉu vi scias, kiu havas naskiĝotagon hodiaŭ?
— Ne, mi ne scias. Ĉu Mimi?
— Ne, ne Mimi, sed nia avino en Svedujo.
— Karlo, skribu al ŝi kaj gratulu ŝin.
Junio, julio kaj aŭgusto estas la varmaj monatoj de la jaro, sed la malvarmaj monatoj estas decembro, januaro kaj februaro. La nomo de la varmaj monatoj estas somero. Decembro, januaro kaj februaro estas vintro. Vintro estas la malvarma sezono, somero estas la varma sezono. La jaro havas kvar sezonojn: vintro, printempo, somero kaj aŭtuno. Printempo estas la plej bela sezono. Majo estas la plej bela monato de la jaro, diras multaj homoj. Aliaj diras, ke ankaŭ aprilo, junio kaj... kaj... ĉiuj aliaj monatoj estas belaj. Ne nur la somero estas bona sezono, sed ankaŭ ĉiuj aliaj. Ne nur ni diras tion, sed ĉiuj aliaj en nia familio. Ne ĉiuj homoj en la mondo havas la varman sezonon en junio, julio kaj aŭgusto. Kelkaj havas ĝin en decembro, januaro kaj februaro.
Tio estas horloĝo. Ĝi havas du montrilojn, unu estas longa, la alia estas mallonga. Ili montras la tempon. La longa montras la minutojn, kaj la mallonga montras la horojn. Unu horo havas sesdek minutojn, kaj unu minuto havas sesdek sekundojn.
— La longa montrilo montras 12, kaj la mallonga montras 3. Kioma horo estas?
Lisa tuj respondas, ĉar ŝi scias tion:
— Estas la tria horo.
Sed se la longa montrilo ne montras 12, ŝi ne scias, kioma horo estas. Karlo kaj Vera instruas ŝin, kaj Lisa lernas nun pri la horoj kaj la horloĝo. Unu tago havas dek du (12) horojn. Ankaŭ la nokto havas dek du horojn. Unu tag-nokto havas dudek kvar (24) horojn. Unu horo havas sesdek (60) minutojn. Tridek (30) minutoj estas duona horo. Dek kvin (15) minutoj estas kvarona horo. Sesdek (60) minutoj estas tuta horo.
Kioma horo estas?
— Lisa, diru, kiom da horoj havas la nokto?
— Ĝi havas 12 horojn.
— Kio estas pli longa, la tago aŭ la nokto?
— Ili estas same longaj.
— Kio estas pli longa, januaro aŭ marto?
— Ili estas same longaj, precize same longaj.
— Kio estas pli longa, duona aŭ kvarona horo?
Lisa ne tuj respondas, sed rigardas la horloĝon kaj pensas.
Post tio ŝi diras:
— Duona horo estas pli longa, ĉar ĝi havas 30 minutojn.
Kvarona horo havas nur dek kvin minutojn.
— Kioma horo estas nun? (la longa montrilo montras 6, kaj la mallonga montras inter 5 kaj 6)
— Estas duono post la kvina.
— Kioma horo estas nun?
— Estas kvarono post la kvina, ĉar la longa montrilo montras tri kaj la mallonga kvin.
— Kioma horo estas nun?
— Estas kvarono antaŭ la kvina, ĉar la longa montrilo montras 9 kaj la mallonga montras 5.
— Kioma horo estas nun?
— Estas kvin minutoj antaŭ la kvina (la longa montrilo montras 11 kaj la mallonga 5).
— La longa montrilo montras 4 kaj la mallonga inter 5 kaj 6. Kioma horo estas?
— Estas dudek minutoj post la kvina (horo).
Perguntas de conhecimento — o 👁 traz a resposta.
Múltipla escolha — clique numa opção em cada frase e depois toque em ✔ Kontroli.
Unu kaj ses nuloj estas ______.
Unu horo havas ______ minutojn.
Tridek minutoj estas ______ horo.
Karlo estas pli aĝa ol Vera — li havas ______ jarojn.
Vera estas ______ aĝa ol Karlo.
Oktobro kaj decembro estas ______ longaj.
Printempo estas la ______ bela sezono.
La mallonga montrilo de la horloĝo montras ______.
La longa montrilo montras 12 kaj la mallonga montras 3. Kioma horo estas? — Estas ______.
Antaŭ lundo estas ______.
Originala titolo: Jardineira · Verkis: Benedito Lacerda kaj Humberto Porto · Traduko: Vitor Mendes